Islom Karimov nomli davlat stipendiyasi qaysi kurs talabalariga beriladi? Stipendiyani olish tartibi
 

O‘zbekiston Respublikasi Vazirlar Mahkamasining “O‘zbekiston iqtidorli yoshlarini taqdirlash va moddiy rag‘batlantirish to‘g‘risida” gi qaroriga ko‘ra har yili mamlakatimizda qobiliyatli yoshlarni rag‘batlantirish, ularni faol yaratuvchilik faoliyatiga keng jalb etish, iqtidorli  talabalarni munosib taqdirlashga alohida e’tibor berib kelinmoqda.

Har yili oliy ta'lim muassasasining faqat 1 nafar talabasiga Islom Karimov stipendiyasi tayinlanadi. Asosiy talab talabalik davrida fanlarni  75% va undan yuqori  a’lo baholarda va 25% va undan kam "4" baholarda o'zlashtirgan bo'lishi lozim.

Islom Karimov nomli davlat stipendiyalari kimlarga beriladi?

Oliy talim muassasasining barcha ta'lim yo'nalishlari bo'yicha tahsil olayotgan 3-bosqich  va 4-bosqich talabalari  tanlovda ishtirok eta oladi. Tanlovning yakuniy natijalari O‘zbekiston Respublikasi Oliy ta'lim fan va innovatsiyalar vazirligi tomonidan o‘tkaziladigan tanlov natijalariga binoan  har bir OTM bo'yicha 1 nafar talabaga tayinlanadi.

Stipensiya qaysi yo‘nalishlar bo‘yicha beriladi?

Tanlovda barcha ta'lim yo'nalishlari talabalari ishtirok eta oladi.

Stipendiya qanday mezonlar asosida beriladi?

Talabalarga Islom Karimov nomli davlat stipendiyalarini tayinlash uchun quyidagi mezonlarni bajarish belgilanadi:
(bakalavrlar uchun, faqatgina 3-4-bosqich talabalari ishtirok eta oladi)

• 4 yoki 6 semestr davomida fanlarni 75%dan yuqori  "5" bahoda, 25%dan kam "4" bahoda o'zlashtirgan bo'lishi(sosiy ko'rsatkich);
• umumta’lim tayyorgarligini ilmiy-tadqiqot (ijodiy ishlar) ishlari bilan uyg‘unlashtirish;
• yo‘nalishlar bo‘yicha konferensiya (tanlov)larda qatnashish;
• kamida ikkita e’lon qilingan ishlar (asarlar)ning mavjudligi;
• tillarni — davlat tilini va bitta xorijiy chet tilni bilish (Mustaqil Davlatlar Hamdo‘stligi mamlakatlari davlat tillaridan tashqari), bakalavriatdagi ta’lim yo‘nalishi yoki magistraturadagi mutaxassislik xorijiy til bo‘lgan taqdirda esa qo‘shimcha ravishda yana bitta xorijiy tilni bilish talab qilinadi;
• O‘zbekiston tarixini bilish.

Ushbu mezonlarni bilish qanday aniqlanadi?

• Tillarni,  O‘zbekiston tarixini bilish bo‘yicha tanlovning saralash bosqichida OTMning maxsus kafedralari huzurida suhbatdan o'tadilar; 
• Suhbat natijalariga ko'ra tavsiya etilgan talabgorlar tanlovning keyingi bosqichida ishtirok eta oladi.

Islom Karimov nomli davlat stipendiyasi uchun qanday hujjatlar topshirish kerak?

Talabgorlar dastlabki ko‘rib chiqish uchun ilmiy kengashga quyidagilarni topshiradilar:

• Hemis tizimidan fanlarni o'zlashtirish qaydnomasi;
• dekanat, kafedra tavsiyanomasi;
• ilmiy (ijodiy) ish annotatsiyasi;
• rahbarning fikr-mulohazalari;
• ilmiy ishlar ro‘yxati va ularning bosma nusxalari;
• ilmiy (ijodiy) yutuqlar nusxasi (diplom, sertifikat, tashakkurnoma va h.k)

Talaba oliygohda Iqtidorli talabalar bilan ishlash bo‘limiga hujjatlarni topshiradi. Barcha hujjatlar bosma va elektron nusxada taqdim qilinadi. Hujjatlarning  to‘plami jildga joylanadi, jild muqovasida ishni taqdim qilgan muassasaning nomi, talabgorning familiyasi, ismi va otasining ismi, ishning nomi ko‘rsatiladi. Talaba tahsil olayotgan oliygoh o‘zining talablaridan kelib chiqqan holda qo‘shimcha hujjatlar talab qilishi mumkin.

Hujjatlarni ko‘rib chiqish ketma-ketligi qanday amalga oshiriladi?

• Islom Karimov nomli  davlat stipendiyasiga nomzodlar ko‘rsatish, OTMda saralash tanlov natijalari o'tkaziladi va yakuniy xulosa uchun ilmiy kengashga taqdim etiladi;
• OTM ilmiy kengashi ochiq ovoz berish yo'li bilan  3 nafargacha nomzodni tanlovning respublika bosqichiga tavsiya etadi.
• Tanlovning respublika bosqichida ilmiy kengashlar yashirin ovoz berish  orqali, oddiy ko‘pchilik ovoz bilan Islom Karimov nomli davlat stipendiyalarini tayinlash uchun stipendiatlar nomzodlarini ko‘rsatish to‘g‘risida qaror qabul qiladilar.
• Ilmiy kengashlar qarorlari vazirliklar va muassasalarning Islom Karimov nomli  davlat stipendiyalarini tayinlash haqida O‘zbekiston Respublikasi Oliy talim, fan va innovatsiyalar vazirligiga tavsiyanoma yuborishi uchun asos hisoblanadi.

• Davlat oliy ta’lim muassasalari talabalariga Islom Karimov nomli  davlat stipendiyalarini tayinlash O‘zbekiston Respublikasi Oliy talim, fan va innovatsiyalar vazirligi hay’ati qarori bilan amalga oshiriladi.

• Stipendiyalar tayinlanishidan avval talabgorlarning belgilangan mezonlarga muvofiq bilim va ilmiy (ijodiy) tayyorgarlik darajasi puxta ekspertizadan o‘tkaziladi.

• Shu maqsadda O‘zbekiston Respublikasi Oliy talim, fan va innovatsiyalar vazirligi:

  - maxsus tanlov komissiyasi tuzadi;

  - talabgorlarning ta’lim va ilmiy (ijodiy) tayyorgarligi darajasini baholash maqsadida yo‘nalishlar bo‘yicha ekspertlar guruhlari tuzadi;

  - tanlov komissiyasi va ekspert guruhlarining ish tartibini belgilaydi;

  - tanlov komissiyasi majlislarini o‘tkazish muddatlarini belgilaydi.

• Tanlov komissiyasi talabgorlarning yakuniy tanlovini yashirin ovoz berish yo‘li bilan o‘tkazadi hamda talabgor va uning ishi uchun ovoz berishda ishtirok etgan komissiya a’zolarining kamida uchdan ikki qismi ovoz berganda talabalar nomzodini Islom Karimov nomli davlat stipendiyalarini tayinlash uchun tavsiya qiladi.

• Agar ovoz berishdan so‘ng talabgorlar soni belgilangan kvotadan ko‘p bo‘lsa, ustunlik eng ko‘p ovoz olgan talabgorlarga beriladi.

• Tanlov komissiyasining qarori O‘zbekiston Respublikasi Oliy talim, fan va innovatsiyalar vazirligi hay’ati tasdiqlagandan so‘ng kuchga kiradi.

• O‘zbekiston Respublikasi Oliy talim, fan va innovatsiyalar vazirligi hay’atining qarori davlat oliy ta’lim muassasalarining talabalarga Islom Karimov nomli davlat stipendiyalarini tayinlash va to‘lash haqida buyruq tayyorlashi uchun asos bo‘ladi.

• Islom Karimov nomli davlat stipendiyalari sovrindorlariga  har yili, bir o‘quv yili uchun, 1-sentabrdan boshlab, belgilangan miqdorlarga qat’iy rioya qilingan holda tayinlanadi.

Vazirlik tomonidan qachon ko‘rib chiqiladi?

O‘zbekiston Respublikasi Oliy talim, fan va innovatsiyalar vazirligi stipendiyalar tayinlash haqidagi tavsiyanomalarni yiliga bir marta ko‘rib chiqadi. Hujjatlarni qabul qilish muddati — 1—15-avgust, ko‘rib chiqish muddati — 10—25-sentabr.

Islom Karimov nomli davlat stipendiyalariga sazovor bo‘lgan talabalarga “Islom Karimov nomli davlat stipendiyasi sovrindori” guvohnomasi beriladi.

Stipendiat bo‘lgan talabalarga qanday imtiyozlar bor?

• Islom Karimov nomli davlat stipendiyalari sohiblari bo‘lgan bakalavriat talabalari oliy ta’lim muassasasini bitirgach, ikki yil davomida magistraturaga davlat granti asosida, qabul kvotasidan tashqari qabul qilinadi.

DIQQAT: Kundalik darslarni o‘zlashtirmaydigan, o‘quv intizomini va ilmiy odob-axloqni buzgan talabalarni o‘quv yili mobaynida O‘zbekiston Respublikasi Prezidentining davlat stipendiyalaridan mahrum qilish tasarrufida talaba o‘qiyotgan oliy ta’lim muassasalari bo‘lgan vazirliklar va idoralarning taqdimiga binoan O‘zbekiston Respublikasi Oliy ta'lim, fan va innovatsiyalar vazirligi hay’ati qarori bilan amalga oshirilishi mumkin.